Се очекува просечното глобално загревање да ја надмине прединдустриската температура за повеќе од 1,5 степени Целзиусови во периодот од 2025 до 2029 година, соопшти во средата со 70% веројатност Светската метеоролошка организација (WMO), агенција на Обединетите нации.
Поради тоа се очекува планетата да остане на историски нивоа на загревање, по двете најтопли години забележани во историјата (2023 и 2024), па дури и најтоплиот децениски период, се наведува во извештајот на британската Метеоролошка служба, заснован на прогнози од десет меѓународни центри, објавен од страна на WMO.
„Токму што ги преживеавме десетте најтопли години во историјата. А, за жал, овој извештај на WMO не покажува никакви знаци на пауза,“ изјави заменик генералниот секретар на WMO, Ко Барет.
Загревањето од 1,5 степени Целзиусови се пресметува во однос на периодот 1850–1900 година, пред човештвото да започне со индустриско согорување на јаглен, нафта и гас, што ослободува јаглерод диоксид — стакленички гас кој во голема мера е одговорен за климатските промени.
Тоа е најамбициозната цел поставена со Парискиот договор од 2015 година, но сè повеќе климатолози сметаат дека е невозможно да се постигне. Емисиите на CO₂ сè уште не почнале глобално да се намалуваат, а дури и продолжуваат да растат.
„Ова целосно се совпаѓа со фактот дека најверојатно ќе ја надминеме границата од 1,5 степени кон крајот на 2020-тите или почетокот на 2030-тите“, коментираше климатологот Питер Торн од Универзитетот Мејнут во Ирска.
Иако е „исклучително малку веројатно“, според WMO, сега постои веројатност – сепак не нула (1%) – дека барем една од следните пет години ќе ја надмине границата од 2 степени Целзиусови загревање.
„Ова е првпат да го гледаме тоа во нашите прогнози“, забележа Адам Скејф од Метеоролошката служба. „Тоа е шок“, иако „во оваа фаза очекувавме дека е можно.“
Тој потсети дека пред десет години прогнозите за првпат покажале многу ниска веројатност дека некоја година ќе ја надмине границата од 1,5 степени. Тоа за првпат се случи во календарската година 2024.
Секој дел од степенот дополнително загревање може да ги засили топлотните бранови, екстремните врнежи, сушите, топењето на ледените капи, морскиот мраз и глечерите.
Ниту 2025 година не носи олеснување.
Минатата недела, Кина во некои региони забележа температури над 40 степени Целзиусови, Обединетите Арапски Емирати речиси 52, а Пакистан беше погоден од смртоносни ветрови по интензивен топлотен бран.
„Веќе достигнавме опасно ниво на глобално загревање“, со неодамнешни „смртоносни поплави во Австралија, Франција, Алжир, Индија, Кина и Гана“ и „шумски пожари во Канада“, изјави Фридерике Ото, климатолог на Империјал колеџот во Лондон.
„Продолжувањето на зависноста од нафта, гас и јаглен во 2025 година е апсолутно лудило.“
