Речиси 530.000 следбеници го има таканаречениот „Офлајн клуб“ на Инстаграм. Тоа звучи речиси иронично, бидејќи офлајн клубот всушност претставува свесно дистанцирање од социјалните медиуми – и од самиот Инстаграм. Управувањето со таа сметка изгледа „парадоксално“, па дури и самите основачи Жорди, Иља и Валентин се свесни за тоа. Овие тројца млади мажи од Холандија сакаат преку офлајн клубот да „ја вратат човечноста во денешното изолирано, од екрани опседнато општество“ – како што напишаа на нивниот профил на англиски јазик, пренесува „Дојче веле“.
Веќе околу една година организираат средби со истомисленици, на кои мобилните телефони и лаптопите треба да се остават настрана. „Дали си подготвен/а да се откажеш од телефонот?“ – прашуваат тие во едно од своите видеа. И се чини дека сè повеќе луѓе се подготвени барем повремено да ги исклучат своите уреди – барем кога се дел од офлајн клубот. Обично тоа трае неколку часа, но понекогаш и неколку дена. Наместо да зјапаат во екранот, учесниците читаат, играат игри, изработуваат ракотворби или едноставно се одмараат. Речиси како во старите времиња – кога паметните телефони сè уште не постоеја. Вака се промовира идејата за офлајн клубот.
Концептот од Холандија се прошири низ целиот свет за само една година. Амстердам беше еден од првите градови, а подоцна се приклучија и Лондон, Париз, Милано и Копенхаген. Слични настани веќе се одржуваат и во Германија. Сè повеќе ресторани и клубови ги замолуваат своите гости да ги остават мобилните уреди дома.
Секогаш онлајн – сакале или не
Се чини дека основачите на офлајн клубот навистина погодиле во сржта. Бидејќи, особено на младите им е тешко да се исклучат – и покрај различните поставки на телефоните кои имаат за цел да го ограничат времето на користење. Дури ни враќањето на добриот стар телефон на преклоп, без апликации – таканаречениот „досаден телефон“ – не успеа да го замени паметниот телефон, иако трендот беше ентузијастички прифатен на социјалните мрежи.
Според податоците на германското ИТ-здружение „Битком“ од крајот на 2024 година, младите од 16 до 29 години поминуваат просечно повеќе од три часа дневно на паметните телефони – повеќе од било која друга возрасна група. А дури и таа бројка веројатно е потценета.
Истражување: Речиси половина од младите посакуваат свет без интернет
Многу млади навистина сакаат да го намалат времето поминато пред екраните. Според ново истражување на Британската институција за стандарди (BSI), речиси 70% од лицата на возраст од 16 до 21 година изјавиле дека се чувствуваат полошо по користење на социјалните мрежи. Половина од нив би поддржале „дигитален полициски час“ – кој би го ограничил пристапот до одредени апликации и веб-страници по 22 часот. Дури 46% од испитаниците изјавиле дека би сакале да пораснат во свет без интернет.
Во истражувањето биле опфатени 1.293 млади луѓе. Резултатите се во согласност со други анкети, како онаа на американскиот истражувачки институт „Харис Пол“ од крајот на 2024 година, каде што многу млади изразиле желба никогаш да не постоеле TikTok, Instagram или X (поранешен Twitter).
Како реагира политиката?
Ова би можело да им оди во прилог на некои политичари – иако нивните чекори засега се претпазливи, и покрај силните барања од младите. Британскиот министер за технологија, Питер Кајл, според весникот „Гардијан“, во вторник ја најави можноста за воведување задолжителни временски ограничувања. Норвешка планира да ја зголеми минималната возраст за користење социјални мрежи од 13 на 15 години.
Кон крајот на 2024 година, Австралија тоа го направи прва – поставувајќи ја границата на 16 години и станувајќи глобален пионер. Во Данска, пак, се менуваат училишните политики и таблетите и телефоните речиси целосно се исклучуваат од училишните простори. „Бевме премногу наивни околу дигитализацијата“, изјави данскиот министер за образование Матијас Тесфаје во 2024 година.
Дали телефонот ве прави депресивни?
Прекумерната употреба на паметните телефони сè почесто се поврзува со психолошки проблеми како депресија, анксиозност, стрес, нарушувања на спиењето и зависничко однесување. Во студија објавена годинава во списанието BMC Medicine, симптомите на депресија се намалиле за 27% по само три недели намалена употреба на телефон.
Според ОЕЦД, менталното здравје на младите драстично се влошило во последниве 15 години. Пандемијата дополнително го засили овој тренд. Истовремено се зголеми и употребата на дигитални медиуми. Сепак, како што наведува ОЕЦД, досегашните истражувања во голема мера не успеале да потврдат јасна причинско-последична врска меѓу овие појави.
Основачите на офлајн клубовите сакаат веднаш да реагираат и да ги прошират своите активности. На собирот во Лондон на почетокот на април, повеќе од 1.000 луѓе ги исклучија своите телефони и насмеани позираа пред камерата. Нов рекорд – гордо објавија организаторите. Секако, на Инстаграм.
Извор: N1info.rs
