Климатскиот систем на Земјата е во поголема нерамнотежа од кога било досега, предупредува Обединети нации преку својата агенција Светска метеоролошка организација.
Според извештајот, планетата апсорбира значително повеќе топлинска енергија отколку што може да ослободи – главно поради емисиите на стакленички гасови како јаглерод диоксид. Ова доведе до рекордно загревање на океаните, забрзано топење на поларниот мраз и зголемен ризик од екстремни временски појави
Гутереш: „Планетата е на граница“
Генералниот секретар на ОН, Антонио Гутереш, упати остро предупредување:
„Планетата Земја е оттурната до своите граници. Секој клучен климатски показател покажува алармантна состојба.“
Тој ги повика државите да се откажат од фосилните горива и да преминат кон обновливи извори на енергија за да се обезбеди климатска и енергетска безбедност.
Алармантни бројки
Последните 11 години се најтопли досега (од 1850 година). Во 2025 година, температурата била за околу 1,43°C повисока од прединдустриското ниво. Концентрацијата на CO₂ е највисока во последни најмалку 2 милиони години
Иако феноменот Ла Ниња имаше привремено разладувачко влијание, се очекува нов циклус на Ел Нињо, кој може да донесе нови температурни рекорди веќе во 2027 година.
Океаните под најголем притисок
Повеќе од 90% од дополнителната топлина завршува во океаните, што има сериозни последици како уништување на морскиот екосистем, поинтензивни бури и покачување на нивото на морето
Според Селест Сауло, човечките активности ја нарушуваат природната рамнотежа со последици што ќе траат со векови.
Што следува?
Научниците предупредуваат дека климатските промени веќе ја засилуваат појавата на екстремни временски услови и ширење на болести. Дополнително, ако се активира Ел Нињо, можно е светот да се соочи со уште поекстремни температури.
Овој извештај е уште едно силно предупредување дека глобалната климатска криза не само што продолжува туку и се забрзува.
