Киселата зелка е еден од најпознатите зимски деликатеси во нашите краишта – полна со витамин C, растителни влакна и природни пробиотици. Но, иако многумина ја сметаат за супернамирница, нутриционистите предупредуваат дека не е здрава за секого.
Овој традиционален специјалитет може да биде ризичен за лица со одредени здравствени проблеми, особено ако се консумира во големи количини или неправилно подготвен.
Кој треба да ја избегнува киселата зелка?
Иако има бројни придобивки, киселата зелка може да предизвика проблеми кај лица кои страдаат од гастритис или чир на желудник, заболувања на црниот дроб и висок крвен притисок или срцеви заболувања.
Поради високата киселост и содржината на натриум (сол), оваа зимница може да предизвика иритација на желудникот, надуеност, задржување течности и дополнителен притисок врз срцето.
„Дури и најздравите намирници можат да бидат штетни доколку се консумираат во прекумерни количини“, предупредуваат нутриционистите.
Можни последици од претерување
Прекумерното консумирање на кисела зелка може да доведе до киселини, надентост и болки во стомакот, воспаление на желудникот (гастритис), покачување на крвниот притисок па дури и до зголемен ризик од срцеви проблеми.
Посебно внимателни треба да бидат повозрасни лица и оние кои имаат срцеви заболувања или нарушена функција на бубрезите, бидејќи натриумот може да го влоши нивниот здравствен статус.
Како да уживате во зимницата без ризик?
Не мора целосно да се откажете од киселата зелка. Ако имате чувствителен стомак или покачен притисок, исперете ја добро пред јадење – така ќе го намалите вишокот сол и киселина. Избирајте поблаги варијанти или домашна зелка ферментирана со помалку сол. Консумирајте ја во умерени количини, како додаток, а не како главно јадење.
Киселата зелка може да биде одличен извор на витамини и пробиотици, но само ако ја консумирате во согласност со вашето здравје. Ако забележите непријатност, болки или проблеми со варењето, најдобро е да се посоветувате со лекар или нутриционист.
