Британската пејачка Olivia Dean беше апсолутна ѕвезда на овогодишното доделување на BRIT Awards, освојувајќи четири престижни признанија и потврдувајќи го својот статус како ново водечко име на британската поп сцена.
Дин, која имаше најмногу номинации заедно со Lola Young, триумфираше уште на почетокот на вечерта со наградата за песна на годината за „Rein Me In“, соработка со Sam Fender. Освен тоа, таа ги освои и признанијата за поп-изведувач на годината, изведувач на годината и албум на годината за својот втор студиски албум „The Art of Loving“.
Дваесет и шестгодишната пејачка, препознатлива по својот соул вокал и звук што комбинира R&B, поп и нео-соул, изјави дека создавањето на албумот ѝ го променило животот. Таа неодамна беше наградена и со Grammy Award за најдобар нов изведувач, со што дополнително ја зацврсти својата меѓународна позиција.
Во останатите категории, Sam Fender беше прогласен за најдобар алтернативен/рок изведувач, додека Lola Young ја доби наградата за пробив на годината. Noel Gallagher беше именуван за текстописец на годината.
Постхумно беше одликуван и легендарниот Ozzy Osbourne, фронтменот на Black Sabbath, кој доби награда за животно дело. Во меѓународната конкуренција, признание за изведувач на годината освои Rosalía.
Годинешната церемонија за првпат се одржа надвор од Лондон, во Манчестер, со што настанот доби дополнителна симболика и нова енергија.
