Олимписките медали што ќе им бидат доделени на спортистите на Зимските олимписки игри во Италија оваа година ќе бидат највредни во историјата, главно поради наглиот раст на цените на благородните метали. Златото и среброто во последните години бележат значителен пораст, што директно влијае врз реалната парична вредност на медалите.
Иако нивната симболична и емоционална вредност е далеку поголема од материјалната, според актуелните пазарни цени златната медала денес вреди околу 2.300 долари, што е повеќе од двојно во споредба со Олимпијадата во Париз во 2024 година. Сребрената медала достигнува речиси 1.400 долари, што претставува значителен раст во однос на претходните години.
Порастот на цените на благородните метали е поттикнат од зголемената побарувачка на инвеститорите и централните банки, како и од глобалните политички и економски неизвесности. И покрај тоа што златните медали содржат само мал дел чисто злато, нивната вредност постојано расте, додека бронзените медали остануваат симболично вредни, но финансиски значително помалку.
Покрај пазарната цена на металите, олимписките медали како колекционерски предмети често достигнуваат многу повисоки суми на аукции. Историските примероци од почетокот на минатиот век денес се продаваат за десетици илјади долари, што покажува дека нивната вистинска вредност со текот на времето може значително да порасне.
