Црквата „Св. Јован Канео“, сместена на карпите над Охридското Езеро, се најде на корицата на специјалното колекционерско издание National Geographic со наслов 100 Places That Will Change Your Life. Не станува збор за редовен број, туку за колекционерско издание, наменето за глобалниот пазар, кое ги собира местата што, според уредничката визија на магазинот, оставаат трајна промена кај оние што ги посетуваат.
Изборот на Охрид не е случаен, ниту е само естетски. „Св. Јован Канео“ одамна ја надмина улогата на разгледнички мотив. Таа е визуелен краток спој меѓу природата и духовноста, меѓу каменот, водата и времето. Во свет во кој патувањата сè почесто се сведуваат на содржина за социјални мрежи, оваа црква продолжува да зборува со тишина.
Фактот што токму ова место е избрано за корица кажува многу за тоа како Охрид се перципира надвор од локалниот контекст. Не како „евтина туристичка алтернатива“, туку како простор со длабока историска, културна и симболичка вредност. Во описот на корицата јасно стои: “The Church of St. John at Kaneo, on Lake Ohrid, North Macedonia” – без фусноти, без објаснувања, без потреба од дополнителна легитимација.
Ова специјално издание е американско по уредување, но дистрибуирано глобално, што значи дека сликата на Охрид патува низ аеродроми, книжарници и дневни соби ширум светот. Во тој контекст, Охрид не е само „убаво место“, туку дел од глобална мапа на искуства што, според National Geographic, оставаат трага.
Во време кога локалните дебати за Охрид најчесто се вртат околу прекумерна урбанизација, туризам без мерка и институционална негрижа, оваа корица доаѓа како тивок контрапункт. Потсетник дека вредноста на градот не е измислена од маркетинг, туку препознаена од светска институција што со децении гради кредибилитет врз внимателен избор и долгорочна перспектива.
Охрид, барем на оваа корица, повторно е она што отсекогаш бил: место што не мора да вика за да биде видено.
