Набљудувачката мисија на ОБСЕ/ОДИХР, која ќе ја предводи амбасадорот Ламберто Заниер, официјално го започна мониторингот за парламентарните избори, што на 11 мај ќе се одржат во Албанија.
– Мисијата доаѓа по покана од албански власти и ќе се состои од тим од 12 експерти со седиште во Тирана. Исто така дел од мисијата, ќе бидат и 26 долгорочни набљудувачи кои ќе бидат во Тирана и ќе бидат распределени низ цела Албанија, додека 300 краткорочни набљудувачи ќе пристигнат неколку дена пред денот на изборите, рече Заниер на прес-конференција.
Додаде дека на денот на изборите ќе има побројна мисија со делегации од Парламентарното собрание на ОБСЕ, Парламентарното собрание на Советот на Европа и делегација од Европскиот парламент.
– Онака како што е мисијата на ОБСЕ/ОДИХР со години, така и овој пат, целта на набљудувачката мисија на изборите е да го процени начинот на кој ќе се спроведат истите, дали тие ќе бидат во согласност со обврските што Албанија ги има преземено во однос на ОБСЕ, како и со меѓународните обврски и стандарди кои ги регулираат демократските избори, се разбира доколку се додадени во согласност со домашното законодавство, нагласи тој.
Според него од интерес ќе бидат спроведувањето на законската рамка, развојот на кампањата, вклучително и кампањата на социјалните мрежи, работата на изборната администрација на сите нивоа, решавањето на споровите поврзани со изборите и медиумското покривање.
Најави и дека во контекст на транспарентноста, мисијата ќе има извештај за своите работни активности две недели пред изборите, ден по изборите на прес-конференција ќе ги презентираат прелиминарните наоди, додека финален извештај за целиот процес на оценување ќе биде објавен неколку месеци по изборите кој ќе ги содржи и соодветните препораки.
