Работилница за млади ликовни таленти се реализира денеска во Вински музеј Кавадарци, во објектот градска Винотека. Настанот е во организација на Музејот, во соработка со Здружението на ликовни уметници „Роднокрајци”.
Ученици од две основни училишта, „Димката Ангелов Габерот” од Кавадарци и Ваташа, сликаат под менторство на нивниот наставник по ликовно образование Горан Боев, како и уметниците Драгица Чекорова, Ќиро Јосифов, Лазар Дојчинов, Трајче Јованов, Ванчо Кеков.
– Кавадарци отсекогаш претставува расадник на ликовни таленти. Бројни врвни уметници потекнуваат од овој град, кои оставиле белег во македонското сликарство и пошироко, истакнаа претставници на здружението.
Директорката на Вински музеј, Елизабета Ристова, нагласи дека продолжува успешната соработка со „Роднокрајци” и дека здружението „исто како и музејот, ги негува историјата, традицијата и културата на тиквешкото поднебје“.
Истовремено со учениците, сликаат и нивните ментори, ликовни уметници. Минијатурните дела создадени од членовите на здружението, Вински музеј ќе ги подари на своите соработници, за новогодишните празници.
