Последиците веќе се прелеваат во економијата, културата и спортот.
Меѓународната осуда ескалираше откако Израел најави копнена офанзива во градот Газа и изврши воздушен напад врз раководството на Хамас во Катар. Дополнителен удар беше извештајот на независна истрага на ОН, кој за првпат заклучи дека Израел извршил геноцид врз Палестинците. Владата во Тел Авив ги отфрли овие наоди, но тие се совпаѓаат со мислења на други експерти и организации за човекови права.
Европската унија, најголем трговски партнер на Израел, минатата недела предложи санкции кои би делумно го суспендирале договорот за слободна трговија. Неколку западни држави веќе воведоа таргетирани санкции, а Франција, Италија, Шпанија, Холандија и Велика Британија прогласија делумни или целосни ембарга на оружје.
Негативниот ефект се чувствува и во економијата – норвешкиот државен инвестициски фонд најави повлекување дел од вложувањата. Дури и премиерот Бенјамин Нетанјаху призна дека Израел е соочен со „вид на изолација“ која може да трае со години.
Културни и спортски бојкоти
Притисокот се проширува и во културата и забавата. Телевизии во Ирска, Холандија и Шпанија најавија бојкот на Евровизија доколку Израел учествува во 2026 година. Во Белгија, фестивал во Гент го откажа настапот на Минхенската филхармонија поради присуството на израелски диригент. Во Холивуд, илјадници филмски работници, меѓу кои и ѕвезди како Оливија Колман и Ема Стоун, ветија дека ќе прекинат соработка со израелски институции.
И спортот е засегнат: завршната етапа на велосипедската тура во Шпанија беше откажана поради протести против тимот Israel-Premier Tech, а израелските шахисти беа спречени да настапат под своето знаме. Во земјата се стравува и од суспензија од европските фудбалски натпреварувања.
Успоредби со Јужна Африка
Бившиот израелски амбасадор во Јужна Африка, Илан Барух, вели дека симболичните притисоци имаат огромно влијание, повлекувајќи паралели со санкциите против јужноафриканскиот апартхејд.
Израел под лупа на ОН
На Генералното собрание на ОН оваа недела, неколку западни држави – меѓу кои Франција, Канада и Велика Британија – официјално ја признаа палестинската држава. Во меѓувреме, налогот за апсење на Нетанјаху издаден од Меѓународниот кривичен суд дополнително ги ограничува неговите меѓународни патувања.
Извор: Index.hr
