Извештајот, објавен од Меѓународната агенција за обновлива енергија (IRENA), претседателството на COP30 во Бразил и Глобалната алијанса за обновливи извори (GRA), предупредува дека светот сè уште каска зад своите цели за обновлива енергија и енергетска ефикасност.
„Мораме да го забрзаме темпото“, стои во извештајот, кој е претставен на подготвителниот состанок за COP30.
Во 2024 година, глобалниот капацитет на обновливи извори се зголемил за 582 гигавати (GW) – годишен раст од 15,1%, што е повеќе од растот во 2023 година (14,4%).
Сепак, за да се постигне целта утврдена на COP28 во Дубаи – тројно зголемување на обновливите извори до 11,2 теравати (TW) до 2030 година – светот треба да додава над 1.100 GW нов капацитет секоја година од 2025 натаму.
Со сегашното темпо, до крајот на деценијата би се достигнале само 10,3 TW, што би било недоволно за да се задржи глобалното затоплување под критичната граница.
Генералниот секретар на Обединетите нации Антонио Гутереш ја нарече енергетската револуција „непобедлива“, но предупреди дека е потребна поголема амбиција и брзина.
„Обновливите извори се најевтиниот и најбрз начин за раст и одржливи работни места, но прозорецот за да ја задржиме границата од 1,5°C се затвора“, рече Гутереш.
Европската унија минатата година инсталирала 72,3 GW нов капацитет, со што вкупниот број достигна 702,6 GW – пораст од над 11% во споредба со 2023 година.
Сепак, според сценариото за ограничување на порастот на температурата на 1,5°C, до 2030 година капацитетот на обновливи извори во ЕУ треба да достигне најмалку 1.247 GW, што би значело дека 79% од вкупната инсталирана енергија би била обновлива (наспроти 60% во 2024).
Најголем придонес се очекува од сончевата и ветерната енергија, кои заедно треба да обезбедат над 57% од вкупното производство на струја до крајот на деценијата.
Во јуни 2025 година, според Евростат, соларната енергија првпат стана главен извор на електрична енергија во ЕУ, со удел од 22% во енергетскиот микс.
Директорот на IRENA, Франческо Ла Камера, изјави дека сегашниот раст е охрабрувачки, но рекордите сами по себе не се доволни.
„Обновливите извори не се само решение за климатската криза, туку и најголемата економска можност на нашето време,“ рече Ла Камера.
„Со зголемување на целите, мобилизација на финансии и продлабочување на меѓународната соработка, големите економии можат да го водат преминот кон чиста енергија и да направат COP30 вистинска пресвртница.“
Извор:Euronews
