Кабинетот на францускиот претседател го објави составот на новата влада, предводена од стариот-нов премиер Себастиен Лекорни, во која за министер за финансии е именуван Ролан Лескјур, близок сојузник на претседателот Емануел Макрон.
Владата на Лекорни претходно траеше само 14 часа.
Лескјур го презема Министерството за финансии во момент кога владата е под огромен притисок да го протурка буџетот за 2025 година низ длабоко поделениот парламент.
Континуитет и промени во новата влада
Лекорни вети дека неговата влада ќе биде „влада на обнова и разновидност“, но остана на претходните избори за трите главни функции, вклучувајќи го министерот за надворешни работи Жан-Ноел Баро и министерот за правда Жералд Дарманин.
Најзначајната промена е новиот министер за внатрешни работи Лоран Нунез, началник на париската полиција, кој доаѓа на местото на Бруно Ретајо, лидерот на Републиканците — конзервативна партија која исто така има претседателски амбиции.
Лекорни се сретнал со Макрон во неделата вечерта за да го договорат составот на владата, два дена откако повторно беше именуван за премиер во екот на најголемата политичка криза во земјата во последните децении.
Предлог-буџетот треба да биде подготвен до среда.
Политичка криза во Франција
Лекорни минатата недела поднесе оставка по само 27 дена на функцијата, бидејќи со составот на владата ги налути членовите на својата десноцентристичка коалиција.
Франција е во криза веќе неколку месеци, бидејќи неколку последователни малцински влади не успеваат да протуркаат мерки за намалување на дефицитот низ парламентот, во кој многумина веќе ја имаат во предвид трката за наследник на Макрон во 2027 година.
Лекорни ја именуваше Катрин Вотрен, ветеранка од десниот центар, за министерка за одбрана — функција која тој ја извршуваше досега. Таа претходно беше министерка за труд во владата на премиерот Франсоа Бајру, а исто така беше министерка и под конзервативниот претседател Жак Ширак.
Нунез, новиот министер за внатрешни работи, дипломирал на елитната Национална школа за администрација (ENA) и извршувал клучни улоги во безбедносниот апарат. Беше директор на разузнавачката служба DGSI (Главна дирекција за внатрешна безбедност).
