Обиколницата кај Солун од утре навечер влегува во 48-часовен режим на целосно затворање на еден од најчувствителните градски сообраќајни коридори, што директно ќе ги погоди и македонските граѓани кои викендов патуваат кон Егејот, аеродромот или кон јужна Грција. Според најавата, прекинот ќе почне во петок, на 13 март, во 23 часот и ќе трае до недела, 15 март, до 23 часот.
Затворањето се однесува на источната внатрешна обиколница на Солун, на делницата меѓу клучките К7 Ептапиргио и К8 Тријандрија, и тоа во двата правци. Причината е рушење на мостот „Агиос Павлос“, како дел од големиот инфраструктурен проект Flyover, кој веќе подолго време создава силен притисок врз сообраќајот во градот.
Во пракса тоа значи дека возилата нема да можат нормално да минуваат по оваа делница, туку ќе бидат пренасочувани низ градската улична мрежа. Во правец кон исток, возилата ќе се пренасочуваат преку улиците Антеон, Елефтериу Венизелу, Акрополеос и авенијата „Охи“, додека во правец кон запад сообраќајот ќе се префрла преку улицата Кацимиди и другите улици низ централното градско подрачје.
Грчката полиција веќе предупреди дека за време на викендот се очекува зголемен метеж, а посебна препорака е товарните возила да ја користат трасата Монастириу–Егнатија–Караманли. Дополнително, во сабота од 9 до 17 часот ќе има и ограничување за товарни возила над 3,5 тони на поширок потег од обиколницата, а на дел од градските улици ќе важи и забрана за запирање и паркирање до недела навечер.
За македонските возачи ова значи дека викендов патувањето преку Солун ќе бара повеќе време, повеќе трпение и повнимателно планирање на рутата. Особено изложени на застои ќе бидат оние што влегуваат во градот во доцните вечерни часови во петок и во текот на саботата, кога пренасочениот сообраќај ќе се слее во веќе оптоварената урбана мрежа. Наместо брз транзит, Солун викендов ќе биде тесно грло за секој што ќе се движи по оваа насока.
