Патничкиот портал Big 7 Travel ја објави својата годишна листа на најпријателски градови за ЛГБТИ+ заедницата во светот, а европските метрополи убедливо го заземаат врвот. Најголемиот скок оваа година го направи Лисабон, кој се најде на првото место благодарение на својата отворена култура, инклузивни настани и развиена ЛГБТИ+ сцена.
Даблин ја зазеде втората позиција, славејќи го својот континуиран напредок во правата на ЛГБТИ+ лицата и гостопримството кон туристите од различни идентитети. Интересно е што Порто, уште еден португалски град, се најде на третото место, потврдувајќи дека Португалија е една од водечките земји во Европа кога станува збор за ЛГБТИ+ прифатливост.
Во првите десет најпријателски градови според рангирањето за 2025 година се најдоа:
- Лисабон, Португалија
- Даблин, Ирска
- Порто, Португалија
- Лондон, Обединето Кралство
- Мадрид, Шпанија
- Берлин, Германија
- Амстердам, Холандија
- Сан Франциско, САД
- Торонто, Канада
- Сиднеј, Австралија
Листата се заснова на глобална анкета која ги мери перцепциите за безбедност, културна прифатливост, број на ЛГБТИ+ настани и достапност на ЛГБТИ+ пријателски простори како што се барови, клубови, книжарници и центри за поддршка.
„Овие градови не само што се популарни туристички дестинации, туку и модели за тоа како може да изгледа едно отворено, праведно и грижливо општество“, стои во соопштението на Big 7 Travel.
Списокот доаѓа во време кога многу ЛГБТИ+ лица сè почесто го земаат предвид културниот и правниот контекст при изборот на дестинации за патување или живот. Токму затоа, овие десет градови стануваат се посакувани не само за патувања, туку и за долгорочна преселба.
