Граѓанската иницијатива О2 Иницијатива денеска организира стручна расправа во Министерството за транспорт, посветена на предложените измени и дополнувања на Правилникот за урбанистичко планирање.
Како што информираат од О2 Иницијатива, расправата ќе се одржи денеска во 14 часот, на четвртиот кат во Министерството за транспорт, во салата за состаноци. Предмет на дискусија се предложените измени со кои хотелите и хотелските комплекси со површина поголема од 1.000 квадратни метри се дефинираат како градби од државно значење.
Од иницијативата посочуваат дека станува збор за десетта измена на Законот и Правилникот за урбанистичко планирање во период од една година и седум месеци. Тие нагласуваат дека јавноста има право да биде информирана за начинот на носење вакви одлуки и ја повикуваат медиумската заедница да присуствува на расправата.
Од О2 Иницијатива најавуваат дека на расправата ќе бидат отворени прашања поврзани со постапката за носење на измените и нивното влијание врз урбанистичкото планирање.
