Nvidia, Amazon и Microsoft водат преговори за можна инвестиција до 60 милијарди долари во компанијата OpenAI, објави во средата порталот The Information.
Според извор запознаен со ситуацијата, Nvidia – која веќе е инвеститор и чии чипови ги напојуваат моделите за вештачка интелигенција на OpenAI – разгледува вложување до 30 милијарди долари. Microsoft, долгогодишен партнер на OpenAI, преговара за инвестиција помала од 10 милијарди долари.
Amazon, кој во овој случај би бил нов инвеститор, разговара за значително поголем износ од 10 милијарди долари, а потенцијално и повеќе од 20 милијарди долари, наведува истиот извор. Вкупниот пакет инвестиции од овие три компании би можел да достигне и до 60 милијарди долари.
Во извештајот на The Information се наведува дека OpenAI е блиску до обезбедување формални инвестициски обврски од споменатите компании.
Можното вложување на Amazon, според истиот извор, би можело да зависи од одвоени преговори. Тие вклучуваат потенцијално проширување на договорот за изнајмување cloud-серверски капацитети меѓу Amazon и OpenAI, како и комерцијален договор според кој OpenAI би ги продавал своите производи – како што се корпоративните претплати за ChatGPT – преку платформата на Amazon.
Овие преговори следуваат по претходни извештаи од оваа недела дека SoftBank Group е во разговори за дополнителна инвестиција до 30 милијарди долари во OpenAI. Во исто време, компанијата се соочува со сè поголеми трошоци за обука и функционирање на своите AI модели, додека конкуренцијата се засилува – особено од страна на Google, кој е во сопственост на Alphabet, пренесува Reuters.
