Одржувањето стабилно ниво на шеќер во крвта е клучно за здравјето, особено кај лица со дијабетес. Урамнотежена исхрана, редовни оброци, хидратација, намалување на стресот, физичка активност и правилно земање терапија се основа за контрола на глукозата. Еден од најефикасните чекори што можете да ги преземете е внимателен избор на намирници.
Не постои волшебна диета за дијабетес бидејќи секој организам различно реагира на одредени намирници. Сепак, некои можат да помогнат во одржување стабилно ниво на шеќер, особено ако се вклучат во оброци со протеини, влакна, здрави масти и зеленчук. Нутриционистите за порталот Eating Well препорачуваат девет корисни намирници кои треба често да се најдат во вашата кошничка – и во вашата исхрана.
Јаткасти плодови
Бадеми, ореви, ф’стаци и лешници се богати со здрави масти (моно- и полинезаситени), кои помагаат во намалување на лошиот холестерол (LDL). Содржат влакна и омега-3 масни киселини, а имаат многу малку јаглехидрати, што значи дека не предизвикуваат нагло зголемување на шеќерот во крвта. Идеални се како ужина или додаток на оброк.
Путер од кикиритки или други јаткасти плодови
Ако преферирате нешто што се мачка, путерот од кикиритки, бадеми или индиски ореви е одличен избор. Кога се комбинира со јаглехидрати – на пример на тост или со јаболко – помага да се забави апсорпцијата на шеќер и се спречува нагол скок на глукозата.
Бобесто овошје
Боровинки, малини, капини и јагоди имаат помалку шеќер од друго овошје, а содржат повеќе влакна. Богати се и со антиоксиданси (особено антоцијанини), кои го поддржуваат здравјето на срцето и мозокот и ги намалуваат воспалителните процеси.
Грчки јогурт без додатоци и засладувачи
Овој тип јогурт е одличен извор на протеини и може да се комбинира со овошје или овесни снегулки за да се намали гликемискиот индекс на оброкот. Помага во контрола на апетитот и обезбедува подолготрајна ситост.
Леблебија (наут)
Наутот е богат со влакна и протеини, кои заедно го регулираат шеќерот во крвта и ја продолжуваат ситоста. Може да се користи во салати, чорби, како и во печени закуски. Помага во намалување на глукозата по оброк и контролирање на апетитот.Грав
Црн, бел, пинто или црвен грав – сите се богати со резистентен скроб кој се вари бавно и не предизвикува нагло покачување на шеќерот. Содржат и растворливи влакна, кои го намалуваат холестеролот и го подобруваат здравјето на цревата.
Овесни снегулки
Овесот е цело зрно богато со резистентен скроб и бета-глукани – вид на влакна кои помагаат во контрола на шеќерот, здравјето на дигестивниот систем и намалување на холестеролот. Овесните снегулки, како каша или „overnight oats“, се идеални за појадок.
Чиа семки
Чиа семките се полни со влакна, растителни омега-3 масни киселини и протеини. Нивните растворливи влакна ја забавуваат дигестијата и апсорпцијата на шеќерот, а притоа обезбедуваат долготрајна ситост. Може да се додаваат во јогурт, овес, смути или салати.
Брокула
Брокулата е зеленчук со малку скроб, но богата со магнезиум, витамин Ц и сулфорафан – растителен соединение што има потенцијално заштитни ефекти против рак. Покрај тоа што е многу хранлива, лесно се комбинира со различни јадења – од вок до прилог со месо.
