Врската помеѓу исхраната и здравјето на дигестивниот систем често се занемарува, но токму одредени намирници му овозможуваат на телото да ги нахрани корисните бактерии во цревата.
Нутриционистката Кетлин Гарсија-Бенсон, за порталот Eating Well, издвојува седум „супер намирници“ кои не само што се вкусни, туку имаат и моќен позитивен ефект врз цревниот микробиом – поддржувајќи сè, од дигестијата и менталното здравје до зајакнување на имунитетот.
Боровинки, малини, капини
Боровинки, малини, капини – вистински шампиони за здравјето на цревата.
Редовната консумација го поттикнува растот на добри бактерии како бифидобактерии и лактобацили.
Ситните семки се богат извор на влакна, а овошјето нуди и хидратација и антиоксиданси.
Полифенолите во бобестото овошје ја намалуваат воспаленоста, го поттикнуваат растот на здрави бактерии и помагаат при регулирање на апетитот.
Праски, нектарини, цреши, кајсии, сливи
Имаат нежен и ароматичен вкус, погодни се свежи, на скара или како додаток во оброци.
Во комбинација со храна богата со протеини (како грчки јогурт) даваат и слатко и солено задоволство.
Ако се јадат со кората, се внесуваат влакна кои ја хранат корисната микрофлора во дебелото црево, што позитивно влијае врз цревната слузница и имунитетот.
Дињи и лубеници
Совршени за летна хидратација – составени се од над 90% вода и содржат електролити како калиум, магнезиум и натриум.
Иако содржат помалку влакна, помагаат во регулирање на столицата преку одржување на течносниот баланс во цревата.
Домат
Доматот е исклучително вреден и флексибилен – во свежа форма хидрира, а варен обезбедува ликопен, антиоксиданс што ја намалува воспаленоста и индиректно го подобрува цревното здравје.
Тиквички и летни тикви
Благи по вкус, погодни за печење, готвење, или јадења како рататјуи.
Содржат и растворливи и нерастворливи влакна, кои ги хранат добрите бактерии, го поттикнуваат движењето на храната низ дигестивниот тракт и покрај тоа, се лесни за варење – важен фактор за лица со чувствителен стомак или синдром на иритабилно црево.
Праз, кромид и лук
Овие зеленчуци се богати со пребиотици – влакна кои ги хранат добрите бактерии.
Помагаат во: подобрување на варењето, апсорпција на минерали (како калциум и магнезиум) и одржување на здрава цревна флора
Совет: Кај лица со нарушен микробиом или SIBO, можат да предизвикаат гасови и надуеност – консултација со нутриционист е препорачлива.
Краставици
Краставиците се освежителни и богати со вода (96%), што ги прави одлични за летна хидратација.
Иако не содржат многу влакна, помагаат во спречување на дехидрација – која може да доведе до забавена дигестија и здравствени проблеми.
Редовниот внес на хидратантна храна е едноставна, но моќна навика.
