Нуклеарен бункер изграден во 1959 година близу Тунстал на крајбрежјето на Источен Јоркшир во Обединетото Кралство може да се урне во море за само неколку дена. Тоа доаѓа поради ерозијата на крајбрежјето која ја задира карпата на која се наоѓа. Советот на Источен Јоркшир ги замолил жителите да се држат настрана од тоа подрачје, пишува Futurism.
Состојба на теренот
Поради несигурната состојба на бункерот, локалните власти издале предупредување за областа на врвот на карпата, како и за делот под неа, во случај на урнување. Дејви Робинсон, аматерски историчар кој го снима последниот период на бункерот, рекол за BBC: „Живееме на едно од најеродирачките крајбрежја во Европа и на овој бункер не му останува многу, можеби само неколку дена“.
Робинсон навел дека тој и неговата партнерка последните девет дена секое утро ја посетуваат локацијата. „Снимките ги објавуваме на нашиот YouTube канал и предизвикуваат интерес ширум светот“, додал тој.
Останаток од Студената војна
Бункерот, официјално познат како Tunstall Royal Observer Corps Post, служел како набљудувачка точка во случај на нуклеарна војна. Според Робинсон, бил дизајниран за луѓе да можат да живеат во него и да чекаат регистрирање на нуклеарна експлозија, како и да информираат други луѓе во други бункери низ земјата. Денес, како што вели, станал „симбол на ерозијата во ова подрачје“.
Последици од ерозијата
Крајбрежната ерозија е природен процес, но геолозите сметаат дека е забрзана поради зголемувањето на нивото на морето поради глобалното затоплување. Во моментов, ерозијата влијае на околу 17% од повеќе од 16.000 километри крајбрежје на Обединетото Кралство, што се чувствува особено во заедниците како Тунстал.
„Целото ова подрачје еродира со голема брзина и гледањето како конкретна зграда се поместува само покажува што навистина се случува“, рекол Робинсон.
