Додека хотелите во Хрватска и Црна Гора ги полнат насловните страници поради енормно високите цени, постои едно (речиси) заборавено јадранско прибежиште кое нуди сè што летото подразбира — но без да ви го испразни паричникот. Сместен меѓу две туристички велесили, босанскохерцеговскиот град Неум станува сè попопуларен кај патниците кои бараат сонце, море и прифатливи цени.
Во Неум сè уште можете да најдете апартман по цена од само 9 евра по лице — вистинска реткост за Јадранот. Ноќевање во хотел со три ѕвездички чини околу 50 евра. Тоа значи дека седум дена одмор во Неум, зависно од типот на сместување, може да ве чини меѓу 65 и 400 евра.
Според порталот „92 патувања“, класичен оброк во ресторан изнесува околу 5 евра. Брзите опции како пица или гирос се нешто поскапи, а за дневни трошоци за храна и пијалоци доволни се 15 до 20 евра на ден. Тоа значи дека седумдневна исхрана ќе ве чини помеѓу 105 и 140 евра.
Такси и јавен превоз се исто така поволни — вкупните трошоци ретко ја надминуваат сумата од 30 евра. За оние кои сакаат активен одмор, изнајмување велосипед, кајак или чамец ќе ве чини од 70 до 100 евра, во зависност од изборот.
Сумирано: економичен седумдневен одмор во Неум може да ве чини веќе од 260 евра, додека умерено комфорна варијанта изнесува околу 670 евра.
Идеално место за оние кои сакаат море без да банкротираат.
