Според најновите сознанија, древните инженери можеби користеле напредни хидраулични технологии уште пред 4.700 години, со што ги предвиделе модерните принципи на градежништво.
Истражувањата се фокусирани на пирамидата на фараонот Џосер – првата позната пирамида од камен во историјата на човештвото. Научниците, предводени од д-р Ксавиер Ландро од францускиот палеотехнички институт CEA, претпоставуваат дека за нејзина изградба бил користен хидрауличен механизам кој преку вертикално вратило ги кревал тешките камени блокови од внатрешноста на пирамидата. Механизмот, наводно, функционирал на сличен начин како што денес функционира движењето на лавата низ вулкански канал.
Клучниот доказ се наоѓа под пирамидата – вертикално вратило што, според истражувачите, било дел од систем за кревање блокови со помош на водна сила. Оваа теорија радикално се разликува од традиционалното верување дека блоковите биле транспортирани преку влечење по рампи и стрмни патеки.
За поткрепа на својата теорија, тимот користел сателитски радарски снимки, со кои ја идентификувале структурата Гиср ел-Мудир – камен комплекс кој содржи технички елементи карактеристични за современи постројки за регулирање вода: бистрелка, резервоар и систем за филтрација. Според д-р Ландро, оваа структура можеби служела за насочување на прочистена вода без седименти до механизмот во внатрешноста на пирамидата, што би значело дека древните Египќани веќе управувале со водни ресурси со завидна прецизност.
Иако денешниот Египет се смета за сушен предел, за време на Третата династија (околу 27 век п.н.е.), климатските услови биле значително поинакви. Тоа било крајот на периодот познат како Зелена Сахара – време кога Северна Африка имала бујна вегетација и изобилство од водни извори. „Пред Четвртата династија, Египќаните повеќе се справувале со поплави отколку со суша“, истакнува д-р Ландро, објаснувајќи ја можноста за функционирање на ваков систем во тогашните услови.
Ова откритие отвора нова перспектива за инженерските способности на древните цивилизации и повторно поттикнува прашања за нивното технолошко знаење. Ако теоријата се потврди, тоа би значело дека пирамидите не се само симбол на моќ и вечност, туку и сведоштво за инженерска генијалност далеку пред своето време.
