Радиото ќе работи во рамки на Лабораториум. Оттука, Стереолаб ја споделува мисијата на овој мултифункционален културен центар – да негува средина во која уметниците и креативците слободно се изразуваат и разменуваат идеи, со верба во трансформативната моќ на колективната експресија. Или, како што опишува еден од првите подготвени џинглови на Стереолаб:
,,Стереолаб верува во трансформативната моќ на културата, уметноста и независните умови. Нашата желба е да Ве инспирираме и ангажираме. Го славиме и локалното и глобалното. Го браниме правото да зборуваме слободно. Посветени, овој град да биде достојно место за живеење”.
Програмата на Стереолаб ќе содржи македонска топ листа на 20 најпопуларни нумери, отворена програма, неделни и месечни авторски емисии/ подкасти, пренос во живо на концерти и други настани кои се одржуваат во Лабораториум. Имајќи предвид дека мултијазичноста ќе биде една од карактеристиките на Стереолаб, ќе се емитува емисија и на албански јазик, како и на други европски јазици, реализирани во соработка со амбасадите во земјава.
Главен уредник на Стереолаб е Дарко Јорданов, а за реализација на програмата се ангажирани повеќемина соработници – најголемиот дел од нив се етаблирани радио водители и диџеи, но и млади луѓе, чие време допрва доаѓа.
