Иако повеќето луѓе крајот на светот го доживуваат како далечен и апстрактен поим, ново истражување покажува дека секој трет Американец смета дека апокалипсата претставува лична и непосредна закана.
Студијата, спроведена од Универзитетот во Калифорнија и објавена од Deutsche Welle, анализира како ваквите уверувања влијаат на перцепцијата на глобалните ризици, вклучувајќи климатски промени, нуклеарна војна, пандемии и развој на вештачка интелигенција.
Истражувачите објаснуваат дека луѓето имаат различни толкувања за „крајот на светот“, од целосно исчезнување на човештвото до колапс на цивилизацијата или дури и можност за нов почеток и обновување на општеството. Психолозите наведуваат дека ставовите зависат од тоа колку брзо се очекува крајот, кој или што се смета за негов причинител и дали по него се очекува уништување или нова фаза на човештвото.
Според истражувањето во кое учествувале околу 3.500 испитаници од САД и Канада, луѓето кои веруваат дека крајот на светот е близу, посериозно ги доживуваат глобалните закани и се поподготвени да поддржат мерки за нивно спречување.
Сепак, истражувачите нагласуваат дека ваквите верувања можат да имаат и спротивни ефекти – дел од луѓето кои сметаат дека исходот е неизбежен помалку поддржуваат колективни политики и превентивни мерки.
Авторите заклучуваат дека начинот на кој луѓето го доживуваат апокалиптичниот концепт е длабоко личен, но истовремено влијае и на општественото однесување и реакцијата на глобалните кризи.
Извор: Deutsche Welle
