Продуцентот на последниот филм на Роман Полански, „Палата“, жали поради фактот што никој не ги сака правата за дистрибуција на филмот во САД, Велика Британија и Франција, велејќи дека моралот не треба да тежи на уметноста.
Еден од најуспешните режисери на својата генерација, Полански побегна од Соединетите Американски Држави поради пресудата за силување на 13-годишно девојче во 1977 година, кривично дело што тој го призна.
Откако движењето #MeToo доби глобално влијание во 2017 година по обвинувањата за сексуална злоупотреба против американскиот филмски продуцент Харви Вајнштајн, голем број жени тврдеа дека Полански сексуално ги нападнал како тинејџерки.
Полански, кој има француско-полско државјанство, ги негираше обвинувањата кои никогаш не отидоа на судење, но оттогаш му беше тешко да обезбеди договори за глобална дистрибуција за неговите филмови, дури и ако актерите сè уште се редат да работат со него.
„Палата“ е комедија сместена во швајцарски хотел населена со група гротескни ликови, а главните улоги ги толкуваат Мики Рурк, Џон Клиз, Оливер Масучи, Фани Ардан и Хоаким Де Алмеида.
Продуцентот Лука Барбарески рече дека ги продал правата за дистрибуција низ континентална Европа, но не и во Франција, Британија или САД, и покрај фактот што во филмот се појавиле познати актери од сите три земји.
Барбарески рече дека последниот филм на Полански „Офицер и шпион“, кој го отвори Филмскиот фестивал во Венеција во 2019 година со пофалби од критичарите, исто така никогаш не бил виден во кината во САД, Британија, Австралија или Нов Зеланд.
„И ние се прашуваме зошто има војни. Англосаксонскиот свет мора да ги почитува уметниците како и остатокот од светот“, рече тој, додавајќи: „Нема морална пресуда за уметноста“.
Тој додаде дека филмовите на Полански се прикажувале на бројни стриминг платформи, како што е Нетфликс, „заработувајќи милиони“ за тие платформи. „Некој да ми ја објасни логиката за тоа“, рече тој.
Поланкси, кој минатиот месец наполни 90 години, не е во Венеција за премиерата на неговиот филм, кој не е во трка за главната награда Златен лав.
Извор: Reuters
