За поголемиот дел од Србија се очекуваат снежни врнежи и појава на поледица, особено во утринските и вечерните часови. Поради магла, видливоста на патиштата е намалена, особено во близина на речни текови, клисури и котлини.
Јавното претпријатие „Патишта на Србија“ апелираше до сите учесници во сообраќајот да бидат особено внимателни и да ја прилагодат брзината на условите на патот, бидејќ на Божиќ, се очекува формирање снежна покривка во поголем дел од Србија. На поширокото подрачје на западна и југозападна Србија, Белград, јужен Банат, Шумадија, Поморавје и источна Србија ќе паѓа дожд кој ќе се заледува при допир со тлото.
Се наведува дека дожд се очекува во утринските, претпладневните и вечерните часови во западна и југозападна Србија, додека попладне и навечер се очекуваат интензивни снежни врнежи и зголемување на висината на снежната покривка од 10 до 15 сантиметри, локално и повеќе, на подрачјето на Белград, северна, западна, централна и југозападна Србија.
Апел од „Патишта на Србија“ до возачите:
- да користат зимски гуми
- да не тргнуваат на пат без зимска опрема и синџири
- да возат внимателно
- да ги почитуваат ограничувањата на брзината и да ја прилагодат брзината на условите на патот
Покрај тоа, се повикува на максимален опрез при возење и прилагодување на брзината поради појавата на магла која ја намалува видливоста на патиштата, особено на делниците долж речни текови, котлини, клисури, како и на патни објекти над реки.
Овие делници се особено опасни
Поради можните ниски температури во утринските и вечерните часови, постои опасност од локална појава на поледица на патиштата, особено на делниците долж речни текови, котлини, клисури, како и на мостови и патни објекти над реки.
Од ЈП „Патишта на Србија“ наведуваат дека поради Божиќ се очекува зголемен интензитет на сообраќај кон сите зимски туристички центри и апелираат до сите учесници во сообраќајот да ја прилагодат брзината на условите на патот и да ги почитуваат сообраќајните прописи.
На наплатните станици на автопатите во Република Србија нема задржувања на возила, а според информациите од Управата за гранична полиција во 13:15 часот, на граничните премини во Србија нема чекање за сите категории возила.
Забрани за тешки возила
Во однос на сервисните информации, на сила се забрани за движење на шлепери и камиони со приколка на следните патни правци:
Шабац – Коцелјева – Ваљево – Подбукови,
Шабац – Волујац – Завлака – Бања Бадања – Крупањ – Грачаница,
Крст – Коренита – Крупањ,
Причевиќ – Пецка,
Ваљево – Поќута – Дебело брдо,
Мионица – Брежѓе – Дивчибаре – Каона,
Рашка – Кути – Одврaтеница,
Нови Пазар – Дежева – Шарoње – Одврaтеница,
Дренска клисура (Дрење) – Грчак,
Станишинци – Грчак,
Добре воде – Гоч – Станишинци,
Јошаничка Бања – Копаоник – Шипачина,
Шипачина – Рудница,
Брзеќе – Копаоник (Јарам),
Копаоник – Јарам и
Ваљево – Лелиќ – Мравињци.
Автопатите и државните патишта се проодни
Автопатите и сите државни патишта од прв и втор ред, како и приодите кон граничните премини и планинските центри, се проодни за сообраќај, соопштија од „Патишта на Србија“.
Снег има локално, во расквасена состојба, до пет сантиметри на територијата на Пожега, Ужице и Ваљево. Во сила е забрана за движење на шлепери на територијата на Крушевац, Ваљево и Нови Пазар.
Од „Патишта на Србија“ истакнуваат дека целокупната расположлива механизација и екипи на патари се на терен и подготвени да реагираат по потреба, како и дека претпријатието располага со доволни количини сол, камен агрегат и ризла.
