Линијата до Барселона ќе се одвива двапати неделно – секој вторник и сабота, додека кон Лион ќе се лета трипати неделно, во вторник, четврток и сабота. Станува збор за две нови дестинации од скопскиот аеродром, една од кои — Барселона — веќе претходно беше достапна, но подолго време недостапна за директни летови.
Од ТАВ информираат дека воспоставувањето на овие линии доаѓа по зголемен интерес и барања од патниците. Лион, кој се вбројува меѓу најголемите гастрономски центри во Европа, досега немал директна поврзаност со македонскиот главен град.
Во рамките на промотивните активности, на првиот лет до Барселона патуваше и добитничка на два бесплатни билета, доделени по случаен избор преку повик објавен на социјалните мрежи на Меѓународниот аеродром Скопје.
