Граѓанската иницијатива „Мостот останува“, која се спротивставува на уривањето на Стариот савски мост во Белград, најави денеска получасовна блокада на Бранковиот мост. Настанот е закажан од 11:52 до 12:07 часот, при што присутните со молчење ќе им оддадат почит на загинатите во несреќата во Нови Сад на 1 ноември, кога при пад на настрешница на Железничката станица загинаа 15 лица.
По минутите молк, ќе се обратат професорот Владета Јанковиќ и активистите Аида Ќоровиќ, Мирјана Подолшак и Илија Вучевиќ. Потоа, граѓаните извикувајќи пароли против корупцијата, ќе го најават на тој начин доаѓањето на жителите на Белград на трите моста во Нови Сад во сабота, 1 февруари.
По блокадата, учесниците ќе се упатат кон кампот на Иницијативата „Мостот останува“ кај Стариот савски мост. Организаторите ги повикуваат граѓаните, синдикатите, стручните здруженија, културните и јавните работници, како и граѓанските и политичките организации, заедно да одбележат три месеци теренска борба за зачувување на Стариот савски мост.
