На студентите од повеќе десетици факултети во градовите низ Србија кои во изминатите десет дена ја блокираа работата на своите високообразовни институции, во петок, на 6 декември им се приклучија и студентите од Медицинскиот, Економскиот и Правниот факултет, како и студентите од Факултетот за ликовни уметности во Белград. На блокадата се приклучија и Природно-математичкиот факултет во Нови Сад и Филозофскиот факултет во Ниш, а од вчера попладне и Правниот факултет во Нови Сад
Блокирана е и зграда на Ректоратот на Универзитетот во Крагуевец, во централна Србија.
Студентите кои блокираат четири државни универзитети во земјата – Белградскиот, Новосадскиот, Нишкиот и Крагуевечкиот – бараат објавување на тајната документација за реконструкцијата на Железничката станица и отфрлање на обвинувањата против уапсените и приведените студенти на протестите кои следеа по несреќата.
Од Министерството за внатрешни работи бараат кривични пријави против оние кои физички ги нападнале студентите и професорите. Бараат и итна потврда на нивниот идентитет, како и разрешување од јавните функции ако ги извршуваат.
Меѓу барањата е и зголемување на издвоените средства за државните факултети за 20 отсто.
Блокади во Нови Сад
„Блокадата на факултетот е симболична. Оваа институција не е виновна за случувањата кои нè погодија и не треба да ги сноси последиците“, рекоа студентите од Природно-математичкиот факултет во Нови Сад.
„Со протестот ја искажуваме нашата незадоволство од состојбата во општеството и ја поддржуваме блокадата на белградските факултети. Страдањето што се случи на 1 ноември трајно го промени нашиот поглед на работите и повеќе нема да бидеме пасивни набљудувачи на тоа како нашата земја се распаѓа“, изјави за Радио Слободна Европа (РСЕ) Радоман Радоман, студент на Природно-математичкиот факултет во Нови Сад.
Студентот од Природно-математичкиот факултет во Нови Сад за РСЕ изјави дека смртта на 15 лица во падот на надстрешницата во тој град „трајно го променила“ погледот на студентите на светот, 6 декември 2024.
Филозофски факултет во Нови Сад, кој се наоѓа во склоп на истиот универзитетски кампус е блокиран од понеделникот
Студентите организирале сместување и исхрана внатре во зданието на факултетот. Влез е дозволен само со важечка индекса на новосадскиот универзитет. Поддршка до студентите стигнала од Одделот за англиски јазик и Одделот за медиски студии.
„Блокадата на Филозофскиот факултет е израз на општата солидарност на академската заедница со општеството кое веќе со недели бар одговорност за убиените на Железничката станица“, соопштиле од Одделот за медиски студии.
„Овој протест се случува во поширок контекст во кој образованието во Србија станува предмет на секојдневни напади“, се наведува во соопштението.
Во Ниш блокада и на Филозофскиот факултет
„Сѐ мора да запре за да нешто може да продолжи. Апсолутно сè треба да запре ако немаме нормалност, ако немаме безбедност и ако стравот е единственото што го имаме“, рече во обраќањето на почетокот на блокадата Андјела Јеремиќ, студентка на Филозофскиот факултет во Ниш.
Поддршка студентите добиле и од своите професори.
„Ние сме тука за нашите студенти, горда сум на моите студенти, имаме млади, паметни луѓе кои знаат што сакаат“, изјави за РСЕ Наталија Јовановиќ, деканка на факултетот.
Управата на Природно-математичкиот факултет во Ниш поднела оставка на 6 декември. Оставка поднеле деканот и петте продекани на факултетот „по лични причини“.
И Крагуевец на мапата на универзитетските градови во блокада
Во Крагуевец, во централна Србија, блокадата на зградата на Ректоратот на Универзитетот ја организираа студентите на Филолошко-уметничкиот факултет (ФИЛУМ) на кои им се приклучиле колеги од Машинскиот, Природно-математичкиот и Медицинскиот факултет во тој град.
„Го блокиравме Ректоратот, формиравме работни групи и ги истакнавме нашите барања. Овде ќе останеме додека не се исполнат сите наши барања“, изјави Андјела Маслак, студентка на четврта година сликарство на ФИЛУМ.
Поддршка од професорите на Филозофскиот факултет во Белград
Советот на сите наставно-научни единици на Филозофскиот факултет во Белград соопшти дека се приклучуваат на студентските блокади и на нивните барања, како и дека ќе ја прекинат наставата.
„Филозофскиот факултет во Белград солидарно стои покрај студентите, се приклучува на изнесените барања и протестот, и во духот на вредностите за кои се залага од своето основање“, се наведува во соопштението.
Студентите на Филозофскиот факултет во Белград меѓу првите влегоа во блокадата на 2 декември.
На 6 декември се приклучија и студентите и Факултетот за ликовни уметности во Белград.
Наставно-уметничко-научното собрание на овој факултет ги поддржа барањата на студентите, потврди за РСЕ доцент Владимир Николиќ.
Претседателот на Србија, Александар Вучиќ, повика на социјалната мрежа Инстаграм на 5 декември младите во Србија да „не се расправаат и тепаат за пари заради рушење на власта“.
Тој изјави дека ќе имаат „можност за тоа до крајот на 2026 или во 2027 година“.
