Уште една тешка железничка несреќа ја потресе Шпанија. Приградски воз излета од шините во близина на Барселона, при што загина машиновозачот, а најмалку 20 лица се повредени, од кои четворица се во критична состојба, соопшти шпанската полиција.
Според службите за итни интервенции, несреќата се случила откако заштитен ѕид се урнал врз железничката пруга, по што возот не можел да запре навреме и излетал од шините. Инцидентот се случил на приградска линија во близина на местото Гелида, во каталонската покраина.
Шпанскиот весник El Pais јавува дека првичните наоди од истрагата укажуваат на тоа дека обилните врнежи од дожд во последните денови можеби ја ослабнале инфраструктурата и довеле до уривање на ѕидот. Сообраќајот на таа железничка линија е целосно прекинат, а патниците се евакуирани.
Истиот ден, уште еден воз излета од шините во Каталонија, овојпат во близина на Жирона, откако камења паднале на пругата поради силна бура. Во тој инцидент нема повредени.
Оваа несреќа се случува само 48 часа по катастрофалниот судир на два воза кај Кордоба, во кој животот го загубија најмалку 41 лице. Спасувачките екипи и понатаму работат на расчистување на остатоците од вагоните, а властите предупредуваат дека конечниот број жртви сè уште не е утврден.
Шпанската влада најави дополнителни безбедносни проверки на железничката инфраструктура, особено на линиите погодени од лоши временски услови.
