Нова експериментална вакцина против рак на кожа, развиена во соработка меѓу фармацевтските компании Moderna и Merck, покажува силни и долготрајни антитуморски ефекти кај пациенти со напреднат меланом.
Петгодишното следење на пациентите вклучени во клиничките испитувања укажува на значајни придобивки во преживувањето, при што ризикот од смрт е намален за 49 проценти, објави Euronews.
Терапијата, која моментално се наоѓа во втора фаза на клинички испитувања, комбинира персонализирана мРНК технологија на Moderna, позната како intismeran autogen, со имунотерапевтскиот лек Keytruda на Merck.
Овој пристап му овозможува на имунолошкиот систем прецизно да ги препознае и уништи канцерогените клетки, при што се постигнува поефикасна и подолготрајна заштита од повторна појава на болеста. Истражувачите истакнуваат дека резултатите се охрабрувачки и претставуваат значаен чекор напред во лекувањето на еден од најагресивните облици на рак на кожа.
