Факултетот за ликовни уметности при Универзитетот „Св. Кирил и Методиј“ во Скопје од денес располага со нова, современо опремена лабораторија за скулптура во дрво, поставена во рамки на Катедрата за скулптура и трансмедиумски практики.
Проектот е реализиран со поддршка од Rotary Club Skopje Centar и компанијата Маквелд ДОО, кои со својата донација овозможија студентите и професорите да добијат професионално уреден простор за креативна и експериментална работа.
Лабораторијата е опремена со рачни и полустационарни електрични алати, што овозможуваат современ пристап кон обработката на дрво и истражување на различни техники и материјали. Овој нов простор ќе овозможи студентите да развиваат оригинални уметнички изрази и да ги продлабочат своите практични знаења во областа на современата скулптура.
Од Факултетот нагласуваат дека ваквите инвестиции се од суштинско значење за унапредување на наставниот процес, истражувачката работа и развојот на нови генерации визуелни уметници. Новата лабораторија, според професорите, ќе претставува и место за колаборација меѓу академската заедница и локалните уметници, но и платформа за идни проекти и изложбени програми.
