Според официјалното соопштение, двајцата полицајци забележале сомнително лице во близина на службено полициско возило. Кога му се приближиле со намера да го легитимираат и приведат, била активирана експлозивна направа.
„Поради здобиените повреди, на местото на настанот загинаа двајца полициски службеници, како и лицето што се наоѓало во нивна близина“, се наведува во соопштението. Експлозијата се случила во густо населен дел од градот. На терен и натаму се припадници на Истражниот комитет, полицијата, Росгвардија и екипи на итната медицинска помош.
Руските власти потврдија дека е покрената кривична постапка. Најавено е спроведување повеќе судско-вештачки анализи, вклучително медицинско и експлозивно-техничко вештачење, со цел да се утврдат околностите на инцидентот, видот на експлозивната направа и начинот на нејзино активирање.
Државното обвинителство го презеде надзорот над истрагата. Засега не е објавено дали третото загинато лице било напаѓачот, ниту дали постои поврзаност со организирани структури или политички мотиви.
Да потсетиме, пред два дена во експлозија на автомобил-бомба во Москва беше убиен рускиот генерал Фанил Сарваров, во близина на местото каде што се случи и ноќешната експлозија. Тоа беше трет случај на убиство на генерал во Москва во изминатата година.
Извор: Index.hr
