Според владината метеоролошка служба, просечната брзина на ветерот во Велингтон достигнала до 87 km/h – највисока од 2013 година. На крајбрежјето во Беаринг Хед, јужно од главниот град, забележани се удари и до 160 km/h.
За Велингтон е издадено црвено предупредување – највисоко можно ниво за силни ветришта. „Ова е далеку посериозно од типичен ветровит ден во Велингтон“, изјави Дaн Нили, портпарол на регионалната агенција за управување со итни ситуации.
Затворени патишта, откажани летови
Патиштата низ регионот се привремено затворени, а бранови ги поплавуваат крајбрежните сообраќајници оставајќи зад себе остатоци. Жителите се повикани да останат во своите домови и да ги обезбедат предметите во дворовите.
Сите летови од меѓународниот аеродром во Велингтон се откажани до попладне, а траектната линија помеѓу Северниот и Јужниот Остров е суспендирана. Затворени се и бројни училишта, вклучително и Универзитетот Викторија во Велингтон.
Вонредна состојба поради поплави
Во регионот Кентербери на Јужниот Остров е прогласена вонредна состојба поради обилни врнежи кои предизвикале поплави и зголемување на нивото на реките. Во општината Селвин се дистрибуираат вреќи со песок, а жителите се повикани да штедат вода и да се евакуираат доколку се во ризични подрачја.
Властите предупредуваат дека силните ветришта ќе продолжат најмалку до утре рано наутро.
