Како дел од подготовките за јубилејното издание, Евровизија го претстави својот најнов изглед – динамичен редизајн кој ја слави 70-годишната историја на фестивалот, но и го отвора патот за неговата иднина. По речиси две децении од последниот визуелен ребрендинг, организаторите на натпреварот открија целосно нов визуелен идентитет кој вклучува модернизирано лого, нов фонт и обновен симбол – сето тоа со цел да се долови духот на настанот кој со децении обединува континенти преку музика.
„Singing Sans“ – гласот на новиот идентитет
Централниот дел од новиот дизајн е целосно новиот фонт специјално креиран за Евровизија – „Singing Sans“. Наместо познатото рачно напишано лого кое беше во употреба од 2004 година, сега гледаме поедноставен, елегантен визуелен израз, кој задржува препознатливост, но со современ изглед.
Иконското срце, симбол кој со години е синоним за фестивалот, добива нова димензија. Новото „камелеонско“ срце е дизајнирано со 70 слоеви – еден за секоја година од постоењето на натпреварот – симболизирајќи ја еволуцијата на фестивалот и неговата способност да се менува заедно со времето.
Следната станица: Австрија 2026
Наредното издание на Евровизија ќе се одржи во Австрија, по победата на 24-годишниот Јоханес Пич, познат како Џеј Џеј, кој во 2025 година ја воодушеви публиката со песната Wasted Love. Натпреварот во 2026 ќе биде првата прилика кога новиот идентитет ќе биде применет во полн капацитет, а според најавите – тоа е само почеток.
Фановите поделени околу новиот дизајн
Иако промените се дочекани со интерес од пошироката публика, дел од фановите не се задоволни. Некои на социјалните мрежи изразија разочараност, нарекувајќи го новиот изглед „најслабиот момент во историјата на дизајнот на Евровизија“. Други, пак, го поздравија потегот како неопходен чекор кон модернизација.
Новата визуелна стратегија е дело на Европската радиодифузна унија (EBU), во партнерство со британското дизајнерско студио PALS, кое и претходно работеше на брендот за Евровизија во Ливерпул во 2023 година.
