Руски дронови синоќа го нападнаа северниот украински град Суми, во втор голем напад за само 24 часа, што доведе до прекин на електричната енергија, соопшти регионалниот гувернер.
„Во рок од половина час Русите изведоа повеќе од 10 дрон-напади врз градот“, напиша гувернерот Олег Хригоров на Телеграм. „Во Суми нема струја. Дел од критичната инфраструктура функционира на резервни извори на енергија“, додаде тој.
Честа мета на руски напади
Гувернерот соопшти дека службите проверуваат дали има жртви и дека електричната енергија ќе биде вратена веднаш штом тоа ќе биде безбедно. Градот Суми, со околу 250.000 жители пред почетокот на војната во февруари 2022 година, често беше цел на руски напади.
Претходно истиот ден, според Хригоров, руски дронови погодиле стамбена зграда во градот, при што биле повредени седум лица.
Руски воздушни напади врз Украина со месеци се насочени кон нејзината енергетска инфраструктура.
