Rogaland Fixed Link, или како што скратено се нарекува Рогфаст, е подводен тунел во изградба во Норвешка, а кога ќе биде завршен во 2033 година, ќе биде најдолгиот и најдлабокиот подморски тунел во светот.
Норвешкиот автопат Е39 се протега од Кристијансанд на југот на Норвешка до Трондхајм на север. Возењето од почетната до крајната точка, кое денес трае 21 час, по завршувањето на овој градежен мегапроект ќе се скрати за половина и ќе го олесни животот меѓу фјордовите, кои ќе мора многу помалку да се потпираат на траекти.
Норвежаните не се почетници кога станува збор за изградбата на подводни тунели кои поврзуваат многу од нивните острови еден со друг или ги прават „поблиску до брегот“, а моментално најдолг е тунелот Рифилке, кој исто така е поставен на 292 метри под површината на морето и со тоа е најдлабокиот тунел во светот.
Самиот тунел Рогфаст се копа во делот под Бокнафјорден и Квицојфјорден во норвешката провинција Рогаланд и ќе биде долг 27 километри, а неговите две цевки широки десет и пол метри ќе бидат поставени на длабочина од 392 метри под нивото на морето, што ќе постават нов светски рекорд, но и нови одредници во патниот инженеринг. Се очекува низ тунелот дневно да минуваат околу шест илјади возила.
За изградбата на Рогфаст ќе се ископаат осум и пол милиони кубни метри камен, кој – затоа што сепак се Норвежани – ќе се користи за други градежни зафати и за мелиорација на околното земјиште.
Покрај напредните техники и решенија кои го контролираат лудиот притисок и обезбедуваат структурен интегритет на пробиените карпи, готовиот тунел ќе биде опремен и со најсовремен систем за следење кој ќе ги анализира податоците во реално време, правејќи го Рогфаст еден од најбезбедните тунели во светот.
Цената на овој мегапроект е многу висока – ќе изнесува околу 22 милијарди норвешки круни или околу 2,1 милијарди евра. Финансиите беа причина што изградбата беше запрена по првичниот моментум во 2019 година, па работата продолжи две години подоцна, а очекуваниот датум на завршување беше поместен од 2026 година во 2033 година.
