Тунелот, чие име е скратеница од „Rogaland fastforbindelse“ или „фискна врска на Рогаланд“, на најдлабоката точка ќе се спушта 392 метри под морското ниво. Работите започнаа во јануари 2018 година, но беа прекинати кон крајот на 2019 поради очекувани пречекорувања на буџетот. Проектот беше обновен во 2021 година, а завршувањето се очекува во 2033, со проценета вредност од околу 25 милијарди норвешки круни, односно приближно две милијарди евра.
Според Ен Брит Моен, раководител на делот што го гради компанијата Skanska, Rogfast ќе ја подобри поврзаноста меѓу регионите Ставангер и Хаугесунд, обезбедувајќи побрза, постабилна и поефикасна сообраќајна врска. Со замената на постојните траектни линии, времето на патување меѓу Берген и Ставангер ќе се скрати за околу 40 минути, што значително ќе го олесни секојдневниот транспорт.
Тунелот ќе има две одделни цевки со по две коловозни ленти, а на неговата средина ќе се наоѓа уникатен двоен кружен тек на длабочина од 260 метри, со дополнителна врска кон островот Квитсеј. Изведбата на ваков подводен мегапроект бара врвни инженерски техники: градежните екипи работат истовремено од двата краја, со цел да се спојат со максимално отстапување од само пет сантиметри, користејќи ласерски мерни системи и напредни дигитални модели.
Rogfast е дел од обновата на автопатот Е39, долг 1.100 километри, кој моментално вклучува седум траекти и чие патување трае 21 час. Стратегијата на Норвешка е траектите постепено да се заменат со тунели и мостови, со што целото патување би се преполовило.
Проектот предвидува и напредни системи за заштита од загадување, вклучувајќи лонгитудинална вентилација и технологија за детекција на инциденти во реално време. Иако укинувањето на траектите ќе резултира со губење одредени работни места, властите очекуваат Rogfast значително да го подобри пристапот до работни позиции, образовни институции и јавни услуги, како и да го поттикне регионалниот економски развој и рибарската индустрија.
Со длабочина што ќе ја надмине онаа на сите постојни подморски тунели, Rogfast ќе стане инженерско достигнување без преседан, подлабок дури и од тунелот Сеикан во Јапонија и тунелот под Ламанш, кои се најдолги во светот, но далеку поплитки.
Извор: N1info.rs
