Да се биде ноќна птица во свет создаден за ранобудници не е воопшто лесно. На пример, луѓето кои остануваат будни до доцна често неправедно се сметаат за мрзливи. Експертите со години предупредуваат дека ноќните бувови имаат поголем ризик од депресија во споредба со оние кои се будат со петлите. Сепак, до сега не беше јасно зошто е тоа така.
Новото истражување објавено во списанието PLOS One можеби конечно ја откри причината зошто ноќните бувови имаат поголема веројатност да страдаат од депресија. Истражувачите од Универзитетот во Сари анкетирале 546 студенти, анализирајќи ги нивните навики на спиење, внимание, грижа, внесување алкохол и ментално здравје. Излегува дека ноќните бувови се повеќе склони кон депресија отколку утринските типови и значително повеќе склони кон грижа, што често се поврзува со депресија.
Студијата ги потврди претходните истражувања кои сугерираат дека луѓето често почнуваат да се грижат и да размислуваат за проблемите кон крајот на денот. Исто така, беше откриено дека утринските луѓе имаат тенденција да бидат повнимателни и свесни за своите емоции и мисли, додека ноќните бувови имаат поголема веројатност да консумираат повеќе алкохол и да имаат полош квалитет на спиење.
Со оглед на тоа што многу млади имаат проблеми со менталното здравје, овие сознанија се од големо значење. Многу млади луѓе често остануваат будни до доцна, а резултатите покажуваат како би можеле да се спроведат мерки за да се намали ризикот од депресија, заклучуваат авторите.
Не само депресија
Бројни студии претходно покажаа дека останувањето до доцна неколку пати неделно може да ги зголеми шансите за развој на срцеви заболувања. Причината за тоа е што нашиот биолошки ритам, кој го регулира спиењето и будноста, влијае на здравјето на срцето и крвните садови. Ноќните бувови исто така се повеќе склони кон развој на дијабетес тип 2 во споредба со оние кои рано си легнуваат.
Ноќните птици повеќе сесклони кон срцеви заболувања и дијабетес
Научниците од Универзитетот Рутгерс во Њу Џерси открија дека ноќните бувови помалку вежбаат во текот на денот и користат повеќе лоши масти за енергија, што доведува до акумулација на маснотии во телото и го зголемува ризикот од дијабетес тип 2 и кардиоваскуларни болести.
Оние кои остануваат будни до доцна се исто така помалку чувствителни на инсулин, кој може сериозно да го загрози здравјето. Друга студија од 2018 година покажа дека жените кои легнуваат доцна имаат поголем ризик од развој на рак на дојка од оние кои следат утринска рутина.
