Заборавете на измамите со спам и СМС – измамниците сега го користат гласот на вашето дете за да ви ги украдат парите. Дигиталната измама стана пософистицирана од кога било. Наместо генерички пораки за изгубени пакети или расипани телефони, сајбер-криминалците денес го користат најемотивното оружје – клонираниот глас на вашето дете. И не, ова не е заплет на научно-фантастичен филм – туку реална опасност која се шири на Интернет со неверојатна брзина.
Како функционира оваа морничава тактика?
Експертите за сајбер безбедност предупредуваат: Криминалците повеќе не користат само текст. Тие сега ги пребаруваат социјалните мрежи за да најдат аудио снимки од вашите деца, семејството или пријателите. Потоа, користејќи напреден софтвер базиран на вештачка интелигенција, тие го копираат гласот – тонот, ритамот на говорот, па дури и емоциите.
После тоа, тие испраќаат гласовни пораки кои изгледаат сосема автентични: дете кое бара помош, тврди дека го изгубило телефонот и користи „нов број“, моли за итен трансфер на пари. Тоа е емотивна бомба, дизајнирана да ве исфрли од синхронизација и да ве натера да реагирате брзо – без проверка.
“Мамо, помогни!” – Неверојатен момент
Џејк Мур од ESET вели дека техниката е толку убедлива што дури и најблиските членови на семејството не можат да направат разлика помеѓу вистинскиот и лажниот глас.
„Луѓето не реагираат рационално кога ќе слушнат како дете им кажува дека е во неволја. Тоа е инстинкт. А криминалците го знаат тоа и го искористуваат до максимум“, објаснува Мур.
Родителите не се единствената цел. Измамниците ги таргетираат и пријателите, бабите и дедовците – секој што може да падне на приказна за итност и неволја. Една порака, еден момент на паника, а парите исчезнуваат без трага.
Социјалните мрежи како алатка на криминалците
Друг алармантен детал: измамниците не праќаат пораки случајно. Тие активно ги следат профилите на своите жртви, ги анализираат нивните објави, односите со семејството, па дури и коментарите, за имитацијата да биде што поверојатна.
Знаат кога сте на одмор, кога славите роденден, кога некој е болен – и ги користат сите тие информации за да ви се зближат. Технологија која до вчера беше забавна – денес се користи за емоционална манипулација и кражба на идентитет на најинтимно ниво.
Како да се заштитите?
Најважното правило: не паничете. Ако примите сомнителна порака или гласовна снимка која наводно е од вашето дете, не испраќајте пари веднаш. Наместо тоа, обидете се да го повикате вистинското дете на бројот што вообичаено го користи. Ако не одговори – пратете порака и поставете прашање што само тој го знае.
Проверете сè – звукот, околностите, однесувањето. Бидете сомнителни – затоа што во ерата на дигитални клонови, дури ни глас веќе не е доказ.
Во свет каде технологијата напредува побрзо од законите и заштитните мерки, единственото нешто што останува е будноста, претпазливоста и здравата доза на сомнеж. На крајот на краиштата, во ерата на дигитални маски – можеби никогаш повеќе нема да можеме да прашаме: „Дали навистина си ти?“ без треперење.
