Центарот за управување со катастрофи на Шри Ланка денес објави дека најмалку 123 лица загинале во поплави и лизгање на земјиштето предизвикани од обилните дождови, додека десетици илјади луѓе се раселени.
Во соопштението се наведува дека 130 лица се пријавени како исчезнати, пренесува „Фигаро“.
Генералниот директор на Центарот за управување со катастрофи, Сампат Котвегода, изјави дека спасувачките операции се во тек и дека речиси 44.000 луѓе се раселени поради силната бура што ја погодува земјата веќе една недела.
Шри Ланка вчера распореди војници за да помогнат во спасувачките напори за стотици луѓе заробени од поплавите, а хеликоптери и воени бродови спроведуваат повеќекратни спасувачки операции во кои жителите беа спасени од врвовите на дрвјата, покривите и од селата отсечени од поплавите.
