Израел има намера да остане во тампон-зоната на југот на Сирија, изјави премиерот Бенјамин Нетанјаху на состанок со израелските амбасадори, според извештаите на локалните медиуми објавени вчера.
Нетанјаху рече дека Израел се надева на постигнување договор за демилитаризација на јужна Сирија, но дека сака да остане присутен во тие области.
„Израел извезува кризи во други земји“
Во саботата, привремениот сириски претседател Ахмед ал-Шара во Доха го обвини Израел дека „извезува кризи во други земји“ и „се бори против духови“.
Ал-Шара се осврна на тековните рации и воздушни напади на израелските сили на југот на Сирија. Тој повторно повика на воспоставување на договорот за раздвојување од 1974 година, со кој е утврдено одвојувањето на израелските и сириските сили по Јомкипурската војна во 1973 година.
„Демилитаризирана тампон-зона“
Во вторникот, Нетанјаху изјави дека очекува Сирија да воспостави „демилитаризирана тампон-зона“ која се протега од главниот град Дамаск до Голанската висорамнина, која Израел ја анектираше.
По падот на поранешниот долгогодишен владетел Башар ал-Асад, Израел распореди војници во тампон-зоната на ОН помеѓу Голанската висорамнина и територијата под контрола на Сирија, вклучувајќи ја и сириската страна на планината Хермон.
Според Нетанјаху, присуството на војската во регионот е неопходно за да се обезбеди безбедноста на израелското население и да се спречат напади од пограничните области. Израел, исто така, сака да ја заштити религиската малцинство Друзи во Сирија, кои се сметаат за сојузници на Израел, пренесува ДПА.
