Инцидентите ескалираа кај Главната железничка станица, каде што млади облечени во црно се обидоа насилно да влезат во метрото, при што беше оштетен влезот во станицата и повредени десетици лица.
Според италијанските медиуми, околу 60 полицајци биле повредени, од кои 23 се пренесени во болница. Приведени се десетина демонстранти, а медицинска помош им е укажана и на 12 учесници на маршот.
Насилната група, која броела околу 100 лица, користела апарати за гаснење пожар и поставувала контејнери како барикади, продолжувајќи да фрла шишиња и канистри кон полицијата. Биле испалени и повеќе чадни бомби, а на главниот влез на станицата била разбиена стаклена фасада.
Градоначалникот на Милано, Џузепе Сала, изјави дека „денешниот вандализам нема никакво оправдување и сигурно не ѝ помага на каузата за Газа“.
Министерот за внатрешни работи Матео Пјантедози додаде дека станува збор за „намерен насилен напад врз полицијата“.
Иако маршот првично започна мирно и во него учествуваа илјадници луѓе, вклучувајќи студенти и пропалестински групи, ситуацијата излезе од контрола кога колоната се приближи до американскиот конзулат. Таму беа запалени знамињата на САД, Израел, НАТО и Европската Унија.
Во протестната поворка учествуваше и познатата италијанска актерка и ТВ-водителка Амбра Анџиолини со својата ќерка, која изјави: „Она што се случува во Газа повеќе не е војна, тоа е дехуманизација која е неприфатлива“.
Протестите и генералниот штрајк предизвикаа сообраќаен хаос во Милано – повеќе железнички линии беа блокирани, а возовите доцнеа и по два часа. Слични акции се одржаа и во други италијански градови, каде што синдикатите блокираа пристапни патишта и пристаништа, барајќи прекин на огнот во Газа и прекин на односите со Израел.
Извор: Index.hr
