Љубовните врски се едни од најважните работи кои влијаат на нашиот живот, но понекогаш нереалните очекувања кои ги имаме не спречуваат целосно да уживаме во односите кои ги градиме.
Врските се често комплицирани, а очекувањата кои ги внесуваме во врските често може да бидат причина за разочарувања и расправии. За да изградиме здрави и задоволителни односи, важно е да ги препознаеме и отфрлиме нереалните очекувања, пишува „The Minds Journal“.
Еве неколку вообичаени нереални очекувања кои ѝ штетат на вашата врска.
- Партнерот секогаш ќе ме разбира или партнерот ќе се промени
Често очекуваме нашиот партнер да може да ги чита нашите мисли и да не разбира без комуникација. Меѓутоа, дури и најблиските луѓе не може секогаш да знаат што чувствуваме или што ни е потребно. Отворената и јасна комуникација е клучна за избегнување на недоразбирања.
Од друга страна, понекогаш влегуваме во врска со надеж дека партнерот ќе се промени во склад со нашите очекувања. Луѓето не може да ги менуваме согласно нашите желби. Важно е да го прифатиме партнерот таков каков што е или да размислиме дали врската е правилен избор.
- Личната среќа зависи само од врската
Многумина веруваат дека врската автоматски ќе ги направи среќни. Иако љубовните врски може да бидат извор на радост и исполнување, никој друг не може да биде одговорен за вашата среќа освен вие самите. Важно е да работиме на личното задоволство и среќа.
- Секогаш ќе се согласуваме
Конфликтите се природен дел од секоја врска. Да очекувате дека никогаш нема да се расправате или да имате несогласувања е нереално. Важно е да се научите конструктивно да ги решавате конфликтите и компромисно да пристапите кон нивно решавање.
- Секогаш ќе сме романтични
Страстта и романтиката може да осцилираат во врската. Да очекуваме дека почетната искра секогаш ќе биде присутна може да доведе до разочарувања. Потребни се труд и посветеност за да се одржи романтичната енергија помеѓу партнерите.
- Се треба да биде совршено
Идејата за совршена врска е илузија. Секоја врска има свои подеми и падови. Наместо да тежнееме кон совршенство, треба да се фокусираме на креирање здрави и исполнувачки врски со партнери кои се поддржуваат.
