Сликата „Биста на жена со цветна капа (Дора Мар)“ е завршена кон крајот на бурната деветгодишна врска на парот и ја прикажува Мар во поубав и повеќебоен стил отколку претходните портрети на Пикасо од неговата тогашна љубовница.
Пикасо направи многу портрети на Мар, вклучувајќи ги и познатите „Портрет на Дора Мар“ и „Дора Мар со мачка“, но таа за нив изјавила: „Сите негови портрети од мене се лаги. Сите се Пикаса. Ниту еден не е Дора Мар.“
Парот се запознал во крајот на 1935 година додека Мар фотографирала за промоција на филмот на Жан Реноар „Кривично дело на господинот Ланг“. Во тоа време, Пикасо бил во врска со Мари-Терез Валтер, со која имал ќерка Маја.
Често ја прикажувал Мар како измачена фигура, често со солзи, како во „La Femme qui pleure“ („Жена што плаче“), што експертите велат дека ја претставувало страдањето за време на Шпанската граѓанска војна, но исто така и неговите наводни злоупотреби и физички пресметки со Мар.
Во откриената слика, лицето на Мар, фрагментирано но обоено во светли бои без перспектива, изгледа тажно и на работ на плач. Во тоа време, Мар дознала дека 61-годишниот Пикасо планирал да ја остави за уметницата Франсоаз Жило, која имала 21 година.
Портретот е завршен во јули 1943 година и бил прикажан само неколкупати надвор од ателјето на Пикасо во улицата „Руе де Гранз Огистен“. Бил во приватна колекција од купувањето во август 1944 година – месецот на ослободувањето на Париз.
Постоењето на сликата било познато само од црно-бела фотографија што се нашла во уметнички каталог. Продавачот, кој наследил слика од својот роднина, е непознат француски колекционер.
За време на Втората светска војна, нацистите сметале дека делата на Пикасо се „дегенерирани“, што довело до упади во неговото ателје и закани за забрана на изложување.
Дора Мар, која починала во Париз во 1997 година на 89 години, е призната како муза, субјект и љубовница на Пикасо, но исто така била сурреалистичка фотографка и нејзиниот стил имал големо влијание врз неговото творештво.
Аукциската куќа Lucien Paris, која ја проценува сликата со димензии 80 x 60 см на околу 8 милиони евра, но очекува да се продаде за многу повеќе, ја држеше во тајност до нејзиното откривање за медиумите.
Аукционерот Кристоф Лусијен ја опиша сликата како ремек-дело и редок пример на светлина во темните денови на окупацијата. Тој нагласи дека експертите ја познавале од фотографиите, но првпат можат да ги видат вистинските бои.
Сликата ќе биде понудена на аукција на 24 октомври и ќе биде изложена три дена пред продажбата.
Извор: The Guardian
