Најмалку 14 пингвини угинале во зоолошката градина во градот Хилваренбек во Холандија поради непозната зараза, пренесоа денес холандските медиуми.
Како што е наведено, во сафари паркот во Хилваренбек угинале 14 пингвини, од кои 11 биле доведени таму од зоолошката градина во градот Леуварден, пренесува „NL Тајмс“.
Според холандските медиуми, споменатите 11 пингвини биле единствените што преживеале зараза од непознато потекло која се појавила во Леуварден.
Сите пингвини угинале во временски период од неколку месеци.
Зоолошката градина во Леуварден одлучила да не чува повеќе пингвини откако заразата, чија причина сè уште не е утврдена, предизвикала смрт на поголемиот дел од локалната колонија африкански пингвини.
Оние што преживеале биле испратени во Хилваренбек.
„Пингвините не беа болни кога пристигнаа, но подоцна покажаа симптоми на зараза слични на оние кај пингвините од Леуварден“, изјави портпаролот на зоолошката градина во Хилваренбек.
Менаџерот на сафари паркот, Мартин ван Хес, изјави дека пингвините станале немирни и го изгубиле апетитот.
„Не знаеме за што точно станува збор, но мислиме дека можеби станува збор за вирус“, рече Ван Хес.
Според неговите зборови, тестовите покажале дека причината за смртта на пингвините не е птичји грип.
Во сафари паркот во Хилваренбек сè уште живеат 52 пингвини и, според изјавите на службениците од зоолошката градина, изгледа дека со нив сè е во ред.
