Цените на нафтата повторно растат откако американскиот претседател Доналд Трамп се закани со нови напади врз Иран, продлабочувајќи ја неизвесноста на глобалните енергетски пазари. Инвеститорите стравуваат дека натамошна ескалација би можела дополнително да го наруши снабдувањето, особено ако кризата околу Ормускиот Теснец потрае.
Според Reuters, пазарите се особено чувствителни на пораките од Вашингтон, бидејќи секоја нова закана за удари врз иранската инфраструктура веднаш отвора страв од нов шок во испораките на нафта. Овие тензии веќе се прелеваат и врз пошироките финансиски пазари, каде растечките цени на енергенсите повторно стануваат глобален ризик.
Во последниот ден на тргување пред празничната пауза, американската WTI нафта скокна за повеќе од 11 проценти, додека Брент порасна за речиси 8 проценти, што е еден од најсилните дневни скокови во последните години. Во поновите извештаи, Брент се движи околу 110 долари за барел, а американската сурова нафта над 111 долари, што покажува дека притисокот врз пазарот не стивнува.
Главниот страв на пазарите останува поврзан со Ормускиот Теснец, преку кој минува значителен дел од светската нафта. Reuters објави и дека OPEC+ се согласил на скромно зголемување на производството за мај, но само ако теснецот повторно биде отворен, што дополнително покажува колку состојбата во регионот останува нестабилна.
Конфликтот засега не покажува знаци на смирување. Откако Иран, според „Волстрит џурнал“, им порачал на медијаторите дека во наредните денови не е подготвен за средба со американски претставници во Исламабад, сè поизвесно е дека напорите за прекин на огнот влегуваат во ќор-сокак.
