„Сакам да живеам во општество во кое сите млади луѓе ќе добијат шанса според нивните капацитети, можности и заслуги. Во општество каде луѓето нема да се разликуваат според тоа колку пари имаат на сметка или по нивната сексуална ориентација. Можеби такво општество е утопија, но ако веќе живееме во систем каков што е овој, тогаш барем оние што ја злоупотребуваат својата позиција за да создаваат неправедни предности ќе треба да одговараат“, вели Неда Здравева, професорка на Правниот факултет, која синоќа беше една од говорничките на форумот организиран од граѓанската иницијатива „Кој е следен“.
Таа нагласува дека сака да живее во држава во која младите имаат вредности, интегритет и култура на однесување, наместо да бидат принудени да ја напуштат земјата.
„Не сакам да образувам млади за туѓи бели дворови. Сакам да останат тука, да ја направат оваа земја добра за нив, пред сè“, додава таа.
Здравева потенцира дека одговорноста за нефункционалноста на системот не лежи само во судската власт, туку и во извршната и законодавната власт.
„Судството е една од трите власти. Одговорни се сите. Идејата е тие да функционираат во систем на меѓусебна контрола, отчетност и одговорност. Но, одговорни сме и ние како граѓани – кога бираме, на кого му даваме доверба и какви политики поддржуваме“, вели таа.
Таа нагласува дека проблемот не е само во тоа колку сме гласни, туку и во тоа колку сме подготвени да се вклучиме и да се откажеме од нешто за да придонесеме за промена.
„Постојано чекаме нешто да ни падне од небо, странците да ни ја завршат работата, а ние да бидеме воодушевени од резултатот. Но, без наше активно учество, промени нема“, предупредува таа.
Според неа, граѓаните не ги забораваат проблемите, туку се чувствуваат немоќно да направат промена.
„Луѓето се обидувале, не успеале, и со текот на времето кренале раце. Во вакво полуструктурирано општество, многу лесно е да ја научите немоќта. Голем дел од граѓаните не се гледаат како дел од државата“, заклучува Здравева.
