За разлика од многу други сирења, Пармезан Реџано не содржи никакви додатоци, а воедно е и сирење со заштитена ознака за потекло (PDO).
Се одликува со светло жолта, кремаста текстура, потемна и погуста, но јадлива кора, и со структура што лесно се распаѓа – што го прави идеално за рендање. Со својот уникатен вкус и мирис, пармезанот е незаменлив во многу италијански јадења, особено со тестенини.
И да, добро прочитавте – неговата кора е јадлива! Затоа, следниот пат кога ќе го рендате пармезанот врз паста или ќе ги собирате последните трошки од даската со сирења, никако не ја фрлајте неговата препознатлива, испрекината кора. Еве неколку одлични начини како да ја искористите:
1. Доматен сос
Еден од најдобрите трикови за збогатување на вкусот на италијанските црвени сосови е додавање кора од пармезан. Без разлика дали станува збор за маринара или болоњезе сос, кората ќе внесе солен и зрел вкус. Најдобро е да ја додадете на почетокот од готвењето – колку подолго се готви, толку повеќе вкус ќе ослободи.
2. Крцкави залачиња од пармезан
Ако сте љубител на крекери со сирење, ќе ги обожавате овие мали деликатеси. Идеални се кога на кората ѝ останало само малку сирење – околу 3 до 6 мм. Подебелите парчиња би биле премногу тврди. Постапката е едноставна: исечете ја кората на квадрати од 2 до 5 см, наредете ги на чинија и загрејте ги во микробранова печка 1 до 2 минути. Оставете ги да се изладат и ќе добиете совршено крцкави залачиња со богат вкус на пармезан.
3. Супа
Кората од пармезан е одличен додаток за збогатување на вкусот на супи. Бидејќи супите често имаат поблаг вкус, пармезанот ќе додаде длабочина и комплексност. Едноставно додадете ја кората додека супата крчка – таа ќе ослободи арома и вкус што ќе го подигне целото јадење на ново ниво.
Извор: Index.hr
