Ново научно истражување открива дека човечкото стареење не напредува рамномерно, туку доживува нагла пресвртница околу 50-тата година од животот. Според анализата објавена во списанието Cell, овој период претставува точка кога опаѓањето на функциите на ткивата и органите станува многу побрзо и поочигледно.

Студијата е заснована на обемна анализа на протеини — клучните биолошки молекули кои го регулираат функционирањето на телото. Научниците ги испитале промените кај 516 примероци од 13 различни ткива, земени од донори на возраст меѓу 14 и 68 години. Примероците ги покривале седум главни телесни системи, што им овозможило да создадат детален „протеомски часовник“ на стареењето.

Резултатите покажуваат дека најзначајните промени се случуваат помеѓу 45-та и 55-та година — период во кој крвните садови, особено аортата, најбрзо ги изразуваат знаците на биолошко стареење. Значителни промени биле забележани и во слезенката и панкреасот, органи поврзани со имунитетот и метаболизмот.

Истражувачите ги споредиле податоците со бази на болести и утврдиле зголемено ниво на 48 протеини поврзани со состојби како кардиоваскуларни заболувања, ткивна фиброза и масен црн дроб. Ваквите промени се тесно поврзани со зголемен ризик од хронични болести во средна возраст.

Дополнителни тестови на глувци ги потврдија резултатите — млади животни кои примиле протеин поврзан со стареењето покажале значително намалена сила, издржливост и координација.

Новото откритие се надоврзува на претходни студии што укажуваат дека стареењето има повеќе „врвови“ и дека повеќе органи стареат со различна динамика. Научниците веруваат дека ваквите сознанија ќе овозможат развој на нови, попрецизни медицински интервенции насочени кон спречување или забавување на процесите на стареење.