НАТО за втор пат во рок од пет дена пресретна балистичка ракета лансирана од Иран кон Турција. Турското Министерство за одбрана соопшти дека ракетата е неутрализирана над областа Газиантеп на југот на земјата, без пријавени жртви или материјална штета.
НАТО и Анкара со заедничко соопштение
Потврда за инцидентот стигна и од Алијансата. Портпаролката на НАТО Алисон Харт објави дека Алијансата „повторно пресретна ракета насочена кон Турција” и дека останува „цврсто подготвена да ги брани сите сојузници од каква било закана”. Турското министерство повика Техеран и сите страни да се воздржат од дејствија кои би ги загрозиле цивилите или би ја поткопале регионалната стабилност, нагласувајќи дека Анкара е „решителна во заштитата на својот воздушен простор”.
Втор напад за пет дена
Ова е втор таков инцидент откако започна новата ескалација на Блискиот Исток. Првото пресретнување се случи пред пет дена, кога воздушните сили на НАТО ја собориле иранската ракета пред да влезе во турскиот воздушен простор. Иран засега не го коментира ниту овој, ниту претходниот напад.
Контекст на регионална ескалација
Инцидентите над Турција се дел од поширока слика на зголемена воена активност по должина на источниот НАТО фланг. Истиот ден, Грција распореди батерија „Патриот” и два ловци Ф-16 во северна Грција за антибалистичка заштита на Бугарија – исто така со директна референца на иранската закана.
